MWENYE AKILI ILIYOSALIMIKA YAMTOSHA ISHARA

YAHITAJI AKILI YENYE UTAMBUZI WA KINA KUNG'AMUA VINGINEVYO UTAIONA NDEFU, AU HUTOELEWA KABISA...MUHIMU NI KUWA ASIYEJUA MAANA HAAMBIWI 

Nilikuta kitabu ndani kwangu, kilikua kitabu kikuu kuu sana. Kimeshiba vumbi la kutosha tu, kana kwamba hakikuwa na mwenyewe. Nilistaajabu nimeshindwaje kukiona kitabu hicho toka nilipoanza kuishi humo ndani. Kitabu hicho kilikua na hadithi nyingi fupi fupi, lakini ni hadithi moja tu iliyonitia wahka wa kutaka kuisoma. Ilianza kama ifuatavyo. Hukooo ulimwenguni! palitokea Wapishi wakuu kutoka meko tofauti, walikutana wakakubaliana kupika pishi la pamoja. Pishi ambalo lingeweza kuliwa na walaji kutoka kila meko hadi milele. Pishi likapikwa, lilipokuwa tayari likawekwa mezani tayari kwa kuliwa. Walaji walikuwa ni wachache tu, lakini waliongezeka kadri siku zilivyozidi kwenda. Walaji walifakamia Pishi hilo lililokuwa na vitamini nyingi kama mbwa mwitu wavamiavyo lindo lao. Miaka mingi iliteketea, Pishi halikuchacha na wala halikuisha. Kadri walivyokuwa wakila pishi hilo ndipo baadhi yao walipopata kubaini dosari mbali mbali za pishi hilo kama vile, chumvi kupungua, iliki kuzidi, ladha ya ndimu kutokuwepo, mafuta kuwa mengi mno na kadhaalika. Walaji wengine walijonea sawa tu. Walipiga tonge za ujazo na uzito tofauti tofauti. “Haya ndo maisha” walisikika. Pamoja na dosari hizo hapakutokea mtu aliyekuwa na ujasiri wa kuzisema, nafikiri kutokana na woga ama heshima kwa wapishi wao wakuu. Walaji walinung’unika lakini mwisho wa siku kila mmoja alisikika akisema kuwa hakupata kula Pishi tamu lenye ladha ya kipekee kama hilo katika umri wake wote. Paliwahi kutokea walaji waliodiriki kusema sema dosari hizo wazi wazi, wengine walidiriki hata kusema hawataki kuendelea kula. Haikujulikana walipotelea wapi. Ikatokea siku ambapo Wapishi wakuu walihama katika ulimwengu huo na kwenda ulimwengu mwingine, kila Mpishi alihama kwa muda wake. Bila shaka waliitwa kwenda kupika pishi kama hilo katika ulimwengu mwengine wa mbli zaidi kwani waliondoka bila kuaga. Pishi waliloliacha liliendelea kuwepo, pamoja na dosari zilizopata kumulikwa na walaji Pishi hilo halikuisha. Miaka iliyoyoma kwa kasi. Manung’uniko ya walaji yalipata nguvu na kasi kama jiwe lililoachiwa kutoka mlimani. Walaji wengine hawakusita kudhihirisha kwa wenzao utamu waliouhisi ambao waliona unazidi kuongezeka katika Pishi hilo, pamoja na yote bado walionekana kama ni luba walioishiwa gundi na badala yake wanatafuta nta ambayo hata ikipatikana haizidi ukali wa ile gundi yao ya asili. Ilifika wakati Ikaonwa ni bora walaji wote wakusanyane pamoja ili kila mmoja asikike anatakaje juu ya Pishi hilo kongwe. Walaji wakakusanyika. Sasa kila mmoja alikua huru kufyatua kauli na mawazo yake. Palizungumzwa hapo mambo tele kwa tele. Pakawa mchana pakawa usiku. Siku zikasukana na kuwa msitu. Ilifika kipindi Walaji walikosa staha sasa ikawa ni kama vita vya wajuzi wa kutengeneza maneno yaliyo uchi. Wapo waliosikika wakisema “Pishi limetushinda.. haliliki tena” wengine waliropoka tu “tulimwage” wengine walidai “tulirudishe jikoni tukalipike upya”, wengine wakadandia “mbona mama yako la kwake lilimshinda pia” “Kama limekushinda, usishindane nalo liwache” mara wengine “Pishi linahitaji mboga..kavu kavu haliliki” “wengine kavu hatujazowea” na hata wapo waliodiriki kusema Wapishi walikosea kulipika Pishi hili kwa pamoja, badala yake walipaswa kulipika kila mmoja sufuria lake na kisha lingetafutwa sufuria jingine lenye mdomo mkubwa kuliko yote ambalo lingechanganya mapishi yote mawili, basi ilimradi walaji wote walitoa mapendekezo na madai yao. Mimi kama msomaji nilitamani sana kuona walaji hao wangeishia wapi, kwa bahati mbaya kile kitabu kilikua kimechanwa karatasi moja iliyobeba kurasa mbili, kurasa ambazo nina hakika zilikua zimelenga kukata kiu ya msomaji, kiu ya kutaka kujua ni nini kingejiri baina ya walaji hao dhidi ya Pishi lile. Karatasi iliyobakia ilikuwa na ukurasa mmoja wa mwisho ambao ulibeba sentsi moja tu ya mkiani mwa hadithi hiyo. Sentensi hiyo iliishia kwa kusomeka “.............na hiyo ndiyo ikawa hatima ya Pishi hilo lililopikwa takribani miaka hamsini iliyopita”.